DUNA na gyuy ordinansa nga giaprobahan sa Konseho sa Dakbayan sa Sugbo nga nagtakda sa mga speed limit sa kadalanan sa siyudad. Maximum nga speed per hour 80 kilometro sa mga national highway nga lapad.

Gipangamahanan ni Konsehal Raymond Alvin Garcia ang ordinansa nga pirmahanan na lang ni Mayor Edgardo Labella. Kon kini mapirmahan sa mayor ug mapublikar sa lokal nga mga mantalaan, di pa ni mapatuman gilayon. Gikinahanglan ang mga ekipo, sama sa speed gun ug speed camera aron naay mapakita nga nakalapas ang driver sa speed limit sa Siyudad.

Maayo ni nga sinugdanan alang sa mas hapsay ug mas luwas nga kadalanan sa Dakbayan sa Sugbo.

Sakto si Konsehal Garcia nga gikinahanglan ang mao nga mga ekipo alang sa ordinansa kay daghan ang mga aksidente tungod sa pagpasagad sa pagpadagan sa abusadong mga drayber nga dali kaayong makapasangil sa brake nga kuno napalpak.

Dugay na kaayo ang panginahanglan ning mao nga ordinansa. Giingon nga long overdue na. Naunhan na gani ang Cebu City sa Dakbayan sa Talisay sa pagpalit og speed guns. Dugay na sab kaayo ang Davao City nga nagpatuman og speed limit nga gigamitan usab og speed guns.

Kon mahuman na ang pagtaud sa tanang mga kable sa bag-ong traffic lights ug naa nay klarong command center ang Siyudad, masugdan na ang pag-monitor sa mga eskina aron masakpan ang mga violator.

Kon naa na usab ang speed gun ug speed camera, mas makatabang kini sa pag-discourage sa kaskaserong mga drayber nga magbuhat sa ilang naandang batasan sa pagpadagan sa sakyanan sa kadalanan.

Hinaut pang dalion nila ni Labella ang pagpatuman sa ordinansa ug proyekto. Kon naa na kini ug sugdan na ang pagpanakop sa mga malapason pinaagi sa no contact policy kay duna na may kapabilidad sa pag-monitor ang Siyudad, di makareklamo ang nakalapas kay naa nay ebidensya.