ANG Covid-19 pandemic dako kaayong leksyon sa kagamhanan. Leksyon nga dako usab kaayo og kadaut sa ekonomiya sa nasod.

Usa sa labing dako nga leksyon mao ang panginahanglan sa political will ug dinaliang aksyon aron di mograbe ang epekto sa pagkuyanap sa sakit.

Sa nasudnong esena, niadto untang nadiskobrehan gilayon ang gigikanan sa epedemya nga mao ang Wuhan, China, gisirhan unta gilayon ni Presidente Rodrigo Duterte ang mga tugpahanan sa nasod alang sa China. Apan wa kini buhata sa Presidente tungod sa diplomatikanhong katarungan. Uwahi na dihang nanirado.

Ang mga nasod nga daling nakapanirado sa ilang mga dapit, sama sa Taiwan ug Vietnam, wa magrabehe sa pagkaigo sa coronavirus disease. Tag manggatos lang ang ilang mga kaso.

Dihang ang Dakbayan sa Sugbo gipailawom sa enhanced community quarantine (ECQ), higpit untang gipatuman ang mga protocol aron di mapasanginlan ang administrasyong Labella nga nagkuwang. Bisan gud ang tinuod nga nangsaka ang mga kaso sa Covid-19 dihang gilugakan ang quarantine level ngadto sa general community quarantine. Ang pattern sa pagsaka wa lang mahitabo sa dakbayan sa Sugbo.

Wa na kinahanglana pa unta ang Malacañang nga mopadala pag dagkong mga opisyal dinhi. Ang paggamit sa gahum subay sa mga balaud aron pagpugos sa ubang lokal nga mga opisyal, inabagan sa ubang mga ahensya sa kagamhanan, kapulisan ug kasundaluhan, igo na nga makapahadlok sa katawhan.

Di usab makaayo sa usa ka administrasyon ang pagsige og uyog sa mga kaatbang kay malawgaw og maayo ang sitwasyon. Kahiusahan ang gikinahanglan, di ang pagpangitag kasaypanan.

Kining mga hitaboa maayo unta nga maleksyon ang mga opisyal nga gikinahanglan ang political will, paspas nga paglihok ug paggamit sa balaud nga way pupanagana alang sa kaayuhan sa kinabag-an.