NAGPLANO ang Philippine National Police (PNP) sa pagpanakop sa mga estambay sa karsada. Kadtong magsuroysuroy sa kadalanan sa lawom nang gabii kay maoy mando ni Presidente Rodrigo Duterte.

Matod sa Presidente nga sagad sa mga tawo nga magsuroysuroy sa kadalanan mao kadtong mga durugista.

Lisod kaayo ning mapatuman, labina sa kalimitado sa gidaghanon sa kapulisan nga magpatrolya sa kadalanan. Wa man gani mapatuman ang local nga curfew ordinances, kini pa kaha nga nasudnong kamandoan?

Gawas nga lisod, kuyaw kining gamiton sa kapulisan nga mangabuso ngadto sa publiko, labina kon way tin-aw nga guidelines kon unsay matawag nga tambay sa karsada. Karong panahuna, kadaghanan sa mga tawo nga naglakaw sa karsada bisan lawom nang gabii, maayo og katuyoan, labina sa urban centers.

Sa kadaghan na ron sa call centers, daghan pang mga tawo nga magtikawtikaw sa kadalanan bisan lawom nang gabii kay padung na sa trabaho. Kon di man gani, gikan pa og mga kalihukan ug padung na mouli sa pinuy-anan.

Maayo tingali nga kon ipatuman kini, dunay koordinasyon tali sa Department of Interior and Local Government (DILG) ug mao nay makigtambayayong sa local government units (LGU) ngadto na sa mga barangay.

Apan mas maayong di na lang kini ipatuman kay bisan unsaon, imposible kining matuman tungod sa limitasyon sa gidaghanon sa kapulisan.

Nganong di man lang dasigon ang mga LGU sa pagpatuman sa higpit sa curfew ug mga ordinansa batok sa paghubog hubog, pagsaba-saba sa kagabhion ug uban pa?

Ang mga LGU aghaton sa DILG sa pagpatuman sa mga ordinansa nga seguradong anaa naaprobahan sa tagsa ka lokalidad, apan wa lang mapatuman sa nahingtundang mga buhatan.