POSIBLING tinuod ning pangagpas sa kapulisan nga manukol na karon sa mga tinugyanan sa balaod ang mga drug personalities nga nag-operate sa dakbayan sa Talisay, Cebu.

Si Sr. Superintendent Manuel Abrugena mipadayag nga ilang naobserbahan nga nagkadaghan ang mga armas nga ilang masakmit gikan sa mga nalambigit sa gidiling drugas atol sa ilang anti-drug operations.

Dugang niya nga natandog ug gikuyawan na karon ang mga dagkong drug personalities sa sunodsunod nilang ronda hinungdan nga namalit kini og armas aron ikasukol sa mga pulis nga mohimo og pagpangronda.

Target sa maong grupo mao ang Drug Enforcement Unit sa Talisay City Police Station. Matod pa nga dunay nga drug personalities nga nanganti ug gibaharan ang mga pulis nga pamusilon sa higayon nga mosulod og mo-raid kini sa ilang dapit.

Niini dili na gyud angay mokompiyansa pa ang atong mga tinugyanan sa balaod sa ilang anti-drug operations.

Dili lang sa ronda sila magmaigmaton lakip na usab sa matag adlaw nilang gimbuhaton kay kining mga tawhana mangita sab og tukmang panahon nga sila makabawos.

Pero kining gibutyag sa Cebu Provincial Police Office (CPPO) nga pipila ka mga piniling opisyal sa Talisay City ang nagpaluyo sa mga drug lord, maoy angay tinuon ug unsa ni katinuod.

Wala man tuod mohingalan og mga tawo, apan seryuso kining maong alegasyon kay nagduhig kini og lama sa kinatibuk-ang sakop sa konseho ug mga opisyal sa dakbayan.

Dili makiangayon ilabi na niadtong mga inosente nga mga konsehal sa siyudad nga maapil sila sa pagduda.

Tungod sa giluwatan sa CPPO morag maglakaw sila sa dalan nga magduko hangtod nga dili mahatagan og katino-an ang pasangil.