ANG Commission on Human Rights (CHR) maakusahan nga kanunay pabor sa mga kabus ug partido nga walay igong gahom batok sa gamhanang estado o adunahang hut-ong sa sosyodad. Apan kini ang ilang mandato sa pagkamugna nga modapig ug molaban sa mga kabus ug dinaugdaog sa pagdemanda og hustisya ug kaangayan.

Ug klaro kini sa internasyonal nga kawsa. Apan dunay haw-ang sa lokal nga kahimtang o sitwasyon sa mga isyu nga naglambigit og gamay nga pundo o grupo, diin biktima usab sa paggamit sa interes sa putilika o indibiduwal ug idolohiya.

Mogawas usahay nga ang usa o duha nga supak mas molanog pa hinuon kaysa mayoriya tungod sa pagpatunga sa grupo nga giingong human rights advocate. Dili ba ang mayoriya maoy maghari sa demokratikanhong pamaagi? Ang gitawag nga “50-plus-1 rule.”

Gihisgotan nato kini tungod sa demolisyon sa Carbon Public Market sa Unit 2 sa ML Quezon Blvd., Barangay Ermita. Si Cebu City Council ex-officio member Jessica Resch, presidente sa Sangguniang Kabataan Federation (SKF) niawhag sa representante sa komisyon alang sa Citizen’s Hour. Gikuwestiyon niya ang moralidad ug legalidad sa demolisyon. Dason niya, 16 ka vendors ang wa masayod sa demolisyon ug dili uyon.

Apan si City Market Administrator Irvin Cabales niingon nga gipahibalo ang vendors bahin sa pagtrabaho sa dan ug drainage sa dapit nga kabahin sa pagtukod sa modernong merkado. Dugang ni Cabales, gihatagan sila og relokasyon ug ibalik dayon sa mas desente nga stall.

Sumala ni Cabales, walay pinugsanay ug uban boluntaryong niguba sa stalls. Giangkon niya nga 20 ka stalls ang gipangguba. Apan 16 ang pangangkon ni Resch nga supak? Asa ang tinuod? Kini ug uban pa ang angay sutaon una modapig sa giingong naagrabiyado alang sa patas nga tawhanong katungod.