Sukad gisugdan ang pagpamakuna batok sa coronavirus disease 2019 (Covid-19), naa pa gihapon sa A3 ang natusokan samtang taudtaud nang gahuwat ang A4. Ang sektor mao ang frontline nga mga trabahante sa mga negusyong nagbukas sukad sa paglugak sa mga quarantine protocol.

Unta gani, kaning mga trabahante, apil na ang kapulisan, maoy giprayoridad sa bakuna tungod kay maoy dugokan sa ekonomiya. Kada adlaw naa nagtrabaho, nigawas sa balay ug mosakay sa mga pampublikong mga sakyanan.

Kon sutaon og maayo, ang A4 nga sektor maoy sagad nangaigo sa nanglabay nga mga pagpanakod sa Covid-19. Di ni angay ikatingala kay nagtrabaho baya busa exposed kaayo sa ubang mga tawo nga wa sab masayod nga carrier diay sa kagaw.

Gikinahanglan man kaha nga mobangon na ang ekonomiya o magpadayon na ang paglihok sa ekonomiya? Aron kini masustenir, kinahanglan nga paspasan ang pagpamakuna ug dalion ang paglakip sa A4 sector. Di angay pang padugayon ang pagbakuna kay ang mga trabahante importante kaayo sa pagbuhi sa ekonomiya.

Apil usab ang mga drayber sa publikong mga sakyanan nga maisip gihapong frontline sa pagpabuhi sa ekonomiya.

Grabe kaayo ang epekto sa mga quarantine nga gipahamtang sa kagamhanan sa dihang hapit tanang mga sentro sa ekonomiya sa nasod naa pa sa enhanced community quarantine (ECQ). Bisan hangtod karon, daghan pang mga negusyo nga wa pa makabawi sa ilang alkanse.

Duawa ang mga mall. Makita kaayo ang kalainan sa wa pa ang pandemic ug pag-igo sa pandemic. Minos ra ang mga tawo nga manuroy sa mall kay kadaghanan mas ganahan sa bukas ug preskong hangin nga sa bukid ug baybayon lang matagamtaman.

Aron di na mobalik pa sa uno, kinahanglang sugdan na ang pagpamakuna sa A4 nga sektor aron di na mahunong ang pagligid sa ekonomiya. Basin kon masubli ang pagsaka sa Covid, di na hinuon makabangon ang negusyo.