Gipahibawo ni PBrig. Gen. Ronnie Montejo, hepe sa Police Regional Office (PRO7) nga ang New People’s Army (NPA) maoy responsabli sa kamatayon sa lima ka mga mag-uuma sa Negros Oriental.

Iyang gibasihan kay mibalik na sa sabakan sa balaod ang kanhi mga sakop sa NPA maong gisumbalik sa ilang mga kauban. Nahitabo ang krimen sa bukiran sa Guihulngan City, Negros Oriental, atubangan mismo sa ilang mga sakop sa pamilya.

NAGPASALAMAT

Angayan sab nga pasalamatan ni Cebu City Mayor Edgardo Labella si Atty. Gus Go tuingod sa padayon pagbakuna sa mga molupyo sa siyudad.

Usa si Go sa mga negusyante nga misuporta sa kampanya sa Covid-19 vaccine ubos sa administrasyon ni Labella.

Instrumento sab ang pagpabakuna ni Labella ug pagdasig sa senior citizens nga magpabakuna.

Una niini, daghang nahadlok nga magpabakuna tungod sa dili maayong reaksyon sa lawas sa tawo. Kay maayo ang resulta sa bakuna, nagsunodsunod ang gidaghanon sa senior citizens ang nagpabakuna.

Gani, gisugdan na sab niadtong Lunes, May 17, ang paggamit sa bakona nga Pfizer nga naggikan sa Amerika.

Ang komon nga bakona batok sa Covid-19 nga naggamit sa siyudad ngadto sa katawhan mao ang gikan sa China.

TABANG NI GWEN

Dakong pasalamat ni 2nd District Provincial Board Member Tata Salvador ngadto kang Cebu Governor Gwen Garcia tungod sa pagtabang niini sa mga lungsod sa iyang distrito sa pagpatuman og mga programa sama sa agrikultura, infrastrutture, electrification ug daghan pa nga napahimuslan sa katawhan.

Sa interview sa Agila, matud ni Salvador, kugihan si Garcia ug wa mahadlok sa Covid-19 aron matabangan ang katawhan.

Usa niini ang pagbalik sa paglihok sa turismo sa ikaduhang distrito nga usa sa mga destinasyon sa turista. Email: efrenlonzon71@gmail.com Text:09235562777