MAKITA mismo ang kalipay si Presidente Rodrigo Roa Duterte sa pag-abot sa mga 600,000 nga doses sa bakunang Sinovac isip donasyon gikan sa China.

Dungan sa maong balita, ming-abiba sab dayon ang mga DDS sa administrasyon. Hilom hinuon sila sa dakong kantidad nga inutang ug gigahin alang sa pagpalit of bakuna. Basta, duna nay nangabot.

Di lang unta sila mangaway sa mga wa mosalig sa Sinovac tungod sa 50.4 % efficacy niini. Total, moabot gud sila og 16 milyones ka botante sa miaging 2016. Kon kining mga nang-abiba karon sa social media dili mga fake account, kulang ra kayo ang 600,000 ka mga dose alang kanila.

Matod pa ni Presidente Duterte, di angay mahadlok ang mga Pinoy sa Sinovac. Kini gipaluyohan sa siyensya ug gituki na sa mga eksperto dinhi sa Pilipinas.

Ang ato lang nahibaw-an kay daghang mga health worker nga wala ganahi nga ang Sinovac ug mas gusto nga magpabakuna gamit ang hinimo sa Pfizer. Ambot, gawas nga ubos ang efficacy niini, natagan na man gud ang kadaghanan kanato sa mga ginama sa China.

Nagpaguwa na og pamahayag ang mga health worker sa Philippine General Hospital (PGH). Pero nabalita nga ang unang Pilipino nga opisyal nga nabakunahan batok sa COvid-19 ginamit kining Sinovac mao si PGH Director Gerardo Legaspi. Ambot lang kaha kining mga health worker sa Vicente Sotto Memorial Medical Center (VSMMC).

Pero, di baya tanan ang ginama sa China mga barot hap. Matod pa, mas abante karon ang mga cell phone nga ginama sa Huawei. Maproblema lang gyud ang mogamit sa Huawei karon kay gikontrahan sa Estados Unidos.

Dayon, mas magpabakuna si Presidente Duterte, iyang pamilya, ug ang mga tiguwang nga sakop sa Cabinet og laing bakuna, ang Sinopharm. Moabot na sab daw sunod semana ang atong supply sa AztraZenica.

Pero sigi na lang, kadaghan sa mga Duterte diehards nga dili fake accounts sa Facebook. Bahala na og ang inyong idolo naghulat pa sa hinimo sa Sinopharm. Palihug lang pag-selfie og i-post dayon aron masiguro kita nga kining mga DDS di diay mahadlok og dagom. DM @anol_cebu.