Ang atensyon sa Cebu media, nga ulahi na gani, naa nakatutok sa mga hospital sa Metro Cebu. Bisan pa man nga ulahi, nakita sa mga sakop sa media nga puno na kini tungod sa pagsulbong karon sa mga kaso sa Covid-19.

Apan sukwahi ang taho gikan sa Department of Health (DOH). Di pa kuno puno mao nga moinsister sila nga luag pa gyud ang mga tambalanan dinhi sa atua.

Hinuon sa katapusan nakong nahibaw-an kabahin sa quarantine center diha sa North Reclamation Area, naa pa gyuy mga bakante ug mild sab ang mga kaso nga tua didto. Ang problema lang kay kulang ang mga doctor ug mga nars.

Unsaon man sab kining Cebu City Hall nga di man makamao mosweldo og sakto sa mga medical personnel. Mas unahon man og release ang anomalosong gipaningil sa Docast alang kuno sa basura. Apan, wa gibayad dayon sa waste facility sa Binaliw.

Kining taho sa DOH 7 nga naa pay bakante sa mga hospital maoy gitamdan tawon ni Gob. Gwen Garcia. Dayon nahisgutan nga gamit kaayo karon ang mga district hospitals.

Mahibong lang ko kay ang mga hulagway sa mga naglinyang mga ambulansya diri sa Chong Hua ug Vicente Sotto Memorial Medical Center (VSMMC) pulos man gikan sa lalawigan.

Angay tingaleng tan-awon sa mga sakop sa Cebu media ang kahimtang karon sa district hospitals. Naa na ba kiniy mga doctor ug mga nars. Naa na bay igong mga medical supplies.

Dinhi makita nato kon andam na ba gyud diay daan ang Sugbo niining 3rd wave sa Covid-19.

Basi sa atong nabasahan kaniadtong flu pandemic sa 1918, mas grabi gyud ang 3rd wave. Ug karon, makapabalaka gyud ang Delta variant nga maoy nadungan sa 3rd wave karon.

Kini mismong kadaghanon sa kasong Delta dinhi sa Sugbo basi kini sa mga swab test nga gibuhat pipila ka semana nga milabay. Unya mas grabi man kaha nga makatakod ang Delta variant.

Alang kanako angay lang nga isipon nga kining paspas nga tinakdanay karon tungod kini sa Delta variant. Ug matod pa, kay mas grabi ang viral load, mas dali mograbi ang epekto ug kuyaw kaayo nga mamatay labina kadtong walay bakuna.

Tungod niini, awhagon nako ang tanan nga magdoble sa ilang pagsunod sa mga mga health protocols. Bisan pa og kumpyansa kaayo ang atong mga opisyal labi na sa Kapitolyo ug sa DOH 7, kita na lang ang managana.

Nakasuway gyud ko nga na-COVID sa miaging Mayo 2021. Dili sayon ang akong naagian bisan pa man og mild ang maong kaso. Grabi ang sakit sa lawas ug magsigi lang og hutoy. Di ko makatarong sa pagginhawa. Grabi ang kadaghan sa mga tambal.

Ug sa kahadlok nga mangatakdan ang sakop sa pamilya ug negusyo, nigasto mi og swab test ug disinfection sa opisina. Mas mag-severe ang epekto niining Delta. Busa mag-amping. Ayaw sunda ang mga opisyal nga kumpyansa kaayo. (DM nako sa @anol_cebu)