IMPORTANTE ba gyud alang sa usa ka pulitiko ang endorsement sa usa ka taas ug inila nga opisyal sama sa Presidente o anak niini? Importante ba gyud nga i-isa ang kamot sa usa kandidato niining maong mga personalidad? Alang sa mga pulitiko lig-on gyud siguro kon adunay endorsement o iisa ang ilang mga kamot sa ilado nga mga tawo. Pero dili baya na garantiya sa kadaugan ang endorsement kay mag-depende ra gihapon ang tanan sa mga botante.

Niadtong mga nanglabay’ng eleksiyon, daghang mga kandidato ang gipang-endorso og mga incumbent Presidents. Apan pilde man gihapon. Sama niadtong 2016, si Mar Roxas mao ang gi-endorso ni kanhi Presidente Noynoy Aquino ug sa iyang igsoon nga si Kris Aquino. Pilde man lagi. Si Joe De Venecia nga gi-endorso ni kanhi Presidente Fidel Ramos. Si kanhi defense secretary Gilbert Teodoro gi-endorse in President Gloria Arroyo niadtong 2010.

Dinhi sa lalawigan da Sugbo, kinsa man gyud ang gi-endorso ni Davao City Mayor Inday Sara Duterte-Carpio ug sa iyang regional political party nga Hugpong ng Pagbabago--Si 3rd district Representative ug One Cebu party chairperson Gwen Garcia ba o si Vice Governor Agnes Magpale? Sa pagbisita ni Sara karong bag-o, iyang giisa ang kamot ni Gwen ug nagpinirmahay pa sila og memorandum of agreement nga mag-alyansa.

Si Gwen usab ang gi-endorso ni Presidente Duterte ug sa PDP Laban. Pero aduna man pod lagi posters nga mikatap karon diin gi-isa ni Inday Sara ang kamot ni Magpale. Gisuportahan ba ni Sara si Magpale? Matod pa ni Magpale nga dugay na ang maong hulagway niadtong pagbisita niya didto sa Davao sa nakalabay’ng buwan. Ug nananghid daw siya ni Inday Sara nga gamiton ang maong hulagway sa iyang mga posters.

So, kon dunay pagtugot kining maong ‘endorsement’ ni Inday Sara dili usab nato mabasol si Magpale nga iya kining i-kapital sa iyang kampaniya. Makadani man usab kini og mga botante. Busa ang mga mabuot nga Sugboanon na lang ang bahala nga mobutar kon si kinsa kanila ang angayan pilion sa pagka-gobernador. (bobbygnalzaro@gmail.com)