NABALAKA ko nga kining nahitabo sa pipila ka local government units (LGUs) sa Metro Manila ug silingang mga lalawigan kansang mga quarantine status gibalik ni Presidente Rodrigo Duterte ngadto sa modified enhanced community quarantine (MECQ) mahitabo usab dinhi sa ato. Gikan sa general community quarantine (GCQ) gibalik ni Duterte ngadto sa MECQ. Kini nunot sa hangyo sa mga medical frontliners nga ibalik sa maong quarantine status ang maong mga lugar nunot sa nagkataas nga kaso sa coronavirus disease (Covid 19).

Gikan sa ECQ, gipaubos na ngadto sa GCQ ang Metro Manila. Apan midaghan ang mga kaso hinungdan nga nabalaka ang mga opisyal sa Inter-Agency Task Force, mirekomendar nga ibalik pagpaubos sa MECQ. Mas gipahugtan ang quarantine rules ug restrictions. Gisira og balik ang commercial establishments ug wala nay public transportation.

Mao kini ang kasagaran mahitabo sa mga lugar nga i-relax ang lockdown o restrictions, mosaka gyud ang mga kaso sa Covid positive. Kay ngano man? Mobalik naman og trabaho ang mga tawo. Mobalik sa ilang naandan nga panginabuhian. Adunay public transportation ug relax na ang mga lagda. So, natural nga mokompiyansa ug magtinakdanay na. Daghan na kaayong mga pag-estudyo kabahin niini.

Bisan ang mga dagkong siyudad sa kalibutan naglisud sa pagpakgang ning maong balatian. Basta luagan gani ang restrictions, mao kini ang kasagaran nga mahitabo kay kompiyansa na lagi ang mga tawo. Bisan ang mga dagko og advanced nga mga nasud, naglisud.

Mao nang dinhi, ato kining obserbahan human sa Agusto 15 diin matapus sa maong adlaw ang atong GCQ status. Kon mokunhod, aw, mas maayo. Apan kon mosaka og balik, aw, mangandam ta sa mas estrikto nga pagpatuman sa atong mga lagda. Posibleng mobalik ta sa ECQ o MECQ aron mapugngan ang mga tawo nga mogawas nga maoy hinungdan sa community infections. Atong hinunduman nga bisan unsang quarantine status, anaa pa gihapon ang virus. Labi pa gyud kon dili kita mosunod sa mga lagda ug mga protocol.

(bobbygnalzaro@gmail.com)