Base sa akong monitoring, ang halos tanang presidential candidates wala pa man maghisgot kaayo sa ilang mga plata porma de gobiyerno. Siguro gumikan kay wala pa man pod opisyal nga magsugod ang official campaign period. Unya pa sa tungatungang bahin sa Pebrero 2022.

Moluntad og 90 ka adlaw ang campaign period alang sa magpapili og national positions sama sa presidente, bise presidente ug mga senador. Samtang, 45 ka adlaw alang sa mga lokal nga posisyon.

Ang uban molakbit sa paghisgot sa pipila ka mga nag-unang isyu apan dili gyud kaayo komprehensibo. Si Senador Manny Pacquiao sige man lang panghatag og kuwarta ngadto sa katawhan nga magtapok kon anaa siya. Halos gani dumugon na siya sa mga tawo gumikan kay mag-ilog sa salapi. Kasagaran sa iyang diskurso kabahin sa iyang ka-pobre kaniadto.

Si Vice President Leni Robredo mohisgot usahay sa pipila ka mga isyu kon adunay mangutana nga taga media. Walay klarong tubag usahay. Sige man lang siyang pangdaut kang Presidente Duterte ug Bongbong Marcos. Si Isko Moreno taphaw man sab kaayo og mga tinubagan. Tiktokan ra man ta ni Yorme usahay.

Si Bongbong Marcos nagkapuliki pa pagtubag sa mga isyo nga mihamok karon kaniya labi pa niining iyang disqualification. Si Bong Go, bisan kon mipahibalo na sa iyang pag-withdraw apan sige man gihapon og suroysuroy. Wala pa hinuon siya opisyal nga mi-withdraw sa iyang candidacy sa Comelec.

Samtang si Senador Panfilo ‘Ping’ Lacson, sama sa iyang gipanawagan sa ubang nga presidential candidates nga himuon ang high level campaign, maghisgot sa mga nag-unang mga isyu karon sa nasud. Sama sa West Philippine Sea, graft and corruption, ekonomiya, edukasyon, peace and order og uban pa. Mao ning klaseha sa mga isyu nga atubangon unya sa mapiling presidente.

Mao ni ang kasagarang motumaw kon dunay presidential debate. Mas maayo seguro nga sa pagkakaron pa lang ila nang ilatad ang ilang mga plata porma aron masayod na ang katawhan sa ilang mga baruganan ug ilang himuon kon modaug.(bobbygnalzaro@gmail.com)