ANG 3,000 ka mga empliyado sa shipyard sa Tayud, Consolacion nga apektado sa pagatukuron nga reclamation project sa lungsod ug sa usa ka private developer modangop kang Presidente Rodrigo Duterte ug sa Philippine Reclamation Authority (PRA) aron ipaabot ang ilang pagsupak ug pagbabag sa proyekto. Gisuportahan usab ang maong mga empliyado sa apektadong mga lumolupyo sa lugar ug sa mga environmentalist.

Si kanhi Urban Poor Commissioner, radio commentator ug international boxing judge Edward Ligas mao ang nag-organized sa shipyard workers aron lig-on gyud ang ilang baruganan. Sa miaging semana, ang maong mga trabahante migahin og oras gikan sa ilang trabaho aron magpahigayon og sunod-sunod nga demontrasyon sulod sa shipyard aron ipalanog ang ilang pagsupak. Ang mga environmentalist nga nasayod kon unsa ang dautang epekto sa pag-ugmad og reclamation misuporta sa ilang kawsa.

Apan bisan pa sa pagpakigbisog sa mga apektadong sektor, ang mga opisyal sa lungsod sa Consolacion nga gipanguluhan sa anak ug inahan, Mayor Joanness ‘Joyjoy’ Alegado ug Bise Mayor Teresa ‘Nene’ Alegado, nagpabungol-bungol sa yango-ngo sa apektadong mga sektor ug mopursige sa ilang plano. Kini bisan kon ang ilang partner, ang La Consolacion Seafront Development Corporation (LCSDC), kuwestiyonable kaayo.

Tiaw nimo nang base sa mga dokumento nga nakuha sa background aning maong korporasyon, aduna lang kini capitalization nga P10 milyones. Unsaon god pag-ugmad aning maong korporasyon sa 235.8 hektaryas nga reclamation nga mokantidad og bilyones ka pesos kon mao ra nay capital? Mora man nig Pharmally nga aduna lay capitalization nga P500,000 apan nakakuha og kontrata sa gobiyerno sa Covid 19 supplies nga mokantidad og P8 billion.

Congressman man kuno ug mayor sa Tarlac ang nanag-iya sa korporasyon. Nagdumili si Mayor Alegado sa paghatag og dokumento kabahin aning korporasyon kay nakapirma kuno siya og confidentiality clause sa kontrata. Kon walay gitago si Alegado, transparent o bukas unta siya sa transaksyon kay ang kagamhanan sa Consolacion ang iyang gi-representahan. Makaduda.

(bobbygnalzaro@gmail.com)