ANG kurapsiyon maoy usa sa mga nag-unang problema sa nasud. Na-ot-ot ang atong gobiyerno gumikan ning maong problema. Dakong pahat sa annual budget napa-ingon sa kurapsiyon. Ang nangaging administrasyon misuway sa pagsulbad niini apan pakyas. Sama ni Presidente Duterte, iyang gisaad nga iya kining sulbaron sulod lang sa pipila ka buwan sa iyang administrasyon. Apan dako siyang pakyas. Gani siya pa man ang mi-ingon nga mo-surender siya kay dili mabang-bang ang problema sa kurapsiyon. Karon eleksiyon na pod. Aduna ba kitay bag-o nga nabati sa mga pamahayag sa atong mga kandidato sa pagka-presidente karon kabahin sa problema sa kurapsiyon sa atong gobiyerno? Morag usa ra man ang akong nadunggan nga nagsige ug hisgot kabahin sa kurapsiyon nga usa sa iyang mga plata porma de gobiyerno. Si Presidential candidate Senador Panfilo ‘Ping’ Lacson sa Partido Reporma ra man. Ang uban molakbit usahay apan wala gyud mohatag og tino og pinong tubag kon unsa-on nila pagsulbad ang problema sa kurapsiyon kon sila man ang mapili. Aduna ba kitay mapaabot nga kausaban kon si kinsa man ang mapili nila? Nagkanayon si Lacson nga iyang sagupon ang iyang gihimo niadtong siya pa ang hepe sa Philippine National Police (PNP) nga iyang gipanggukod ang mga corrupt PNP officers labi pa ang nga ‘Kotong cops’. Iyang ipa-entrap ang mga corrupt government officials aron mapasakaan gyud og kaso og mataral sa hukmanan. Lapad kaayo ang government bureaucracy ug lisud kaayo sumpoon kining kurapsiyon. Halos tanang mga ahensiya sa kagamhanan aduna gyuy kurapsiyon. Dili santos o Ginoo kining atong mga opisyal og mga empliyado sa kagamhanan. Bisan man gani ang simbahan aduna may kurapsiyon. Bisan pa siguro kon atong pamatyon ang mga hamtong nga mga tawo, magpabilin kining problemaha kay ang mosunod nga mga gene­rasyon mohimo naman pod niini. Naa na kini sa atong sestema og kultura. Matod sa kanhi presidente sa Amerika, John Kennedy: ‘Our problems are man-made, therefore, they can be solved by man.’ Mao ni dakong problema sa atong mga lider. Mitanyag sila kanato og kasulbaran sa dagkong problema nga minugna ra sab nilang mga pulitiko. Hopeless na ba kining problema? (bobbygnalzaro@gmail.com)