MAAYONG sinyales nga daghang nisugot sa pagpabakuna batok sa coronavirus disease 2019 (Covid-19) human daghang residente sa dakbayan sa Sugbo ubos sa Priority Codes A2 and A3, ang gikataho nga nagparehistro online. Apan ang Vaccine Advisory Board (VAB) sa dakbayan, dili pa makabalik sa Covid-19 vaccination rollout. Nahutdan og supply ang dakbayan sa pagkakaron ug nagpaabot sa laing hugna sa vaccines.

Dili nato wad-on ang kainit sa pagpabakuna. Magpailub lang usa sa pag-abot sa bakuna. Makasabot kita nga nihit gyud ang supply tungod sa kataas sa demanda dili lang sa atong nasod, apan tibuok usab sa kalibotan. Nasayod kita nga ang mga lokal nga opisyal ug awtoridad sa panglawas naningkamot nga madali kini.

Karong adlawa, Abril 26, si Cebu City Health Departnent (CHD) officer-in-charge Jeffrey Ibones nagkanayon nga ang tulo ka mga vaccine site sa dakbayan magpabiling sirado human walay ma-inject nga bakuna ang frontliner ug mga boluntaryo sa programa sa pagpabakuna.

Sumala ni Ibones, ang Department of Health (DOH) Central Visayas wala pa mohatag og tino nga petsa sa pag-abot sa mosunod nga hugna sa bakuna. Kon dunay moabot ning semanaha, sugdan og balik ang paghatag niini sa Priority Code A3, diin mosunod ang senior citizens o Priority Code A2.

Base sa Abril 25 nga talaan sa CHD, dunay 26,215 ka senior citizens ang nagparehistro online. Ang gidaghanon sa mga tawo nga dunay comorbidities o naghambin og duha o daghang pang sakit nga nagparehistro online, dugang sa CHD, niabot og 27,520. Busa, makaingon kita nga grabe ang pagsalig sa katawhan.

Ang pagsalig ug pagtuo sa tambal importanteng aspeto sa proseso sa pag-ayo sa sakit sa usa ka pasyente. Taas ang kalamposan sa programa kon ang tanan dunay kooperasyon ug mopaambit kanunay sa positibong epekto sama sa nasinati sa nag-unang naturokan og bakuna.