NANGMINGHOY na sud sa selda sa kapulisan sa Davao City ang upat ka mga lalaki nga nasikop sa giingong drug den ug usa ka nagpailang singer nga nadakpan sab sa laing buy-bust operation niadtong Hulyo 5, 2022.

Unang nadakpan ang upat ka mga lalaki didto sa drug den sa Purok 36, San Agustin Street, Ulas, Barangay Talomo Proper Davao City.

Nasakmit sa Philippine Drug Enforcement Agency (PDEA)-Davao ug sa National Bureau of Investigation (NBI)-Davao ang mga gituohang shabu nga nagkantidad og P165,000.

Alas 4 sa hapon, nadakpan sab ang alyas Marie, 53, nagpailang singer sa buy-bust operation sud sa usa ka inn sa Barangay Matina Crossing ning dakbayan.

Sumala sa Davao City Police Office Special Operation group/City Drug Enforcement Unit, ang suspek maoy ika-upat sa drug watchlist sa Davao Region.

Anaa sa 35 gramos o P560,000 nga balor sa mga ilegal nga druga ang nahipos sa awtoridad.

Gipangkasohan na ang mga suspetsado didto sa korte.