KIDAPAWAN CITY -- Gisulod na sa isolation room ang usa sa tulo ka tawo nga patients under investigation (PUI) sa Soccsksargen gumikan sa coronavirus disease 2019 o Covid-19.

Kini ang gikumpirma ni Department of Health (DOH)-Soccsksargen Health Education and Promotions Officer Arjohn Gangoso.

Naka-medical isolate karon ang maong PUI sa wala gitumbok nga ospital sa rehiyon gumikan aduna siya'y sintomas sa Covid-19.

Matud ni Gangoso nga gipadala na ang specimen samples sa PUI sa Research Institute for Tropical Medicine (RITM) alang sa confirmatory test.

Moabot sa 12 ka adlaw nga na-quarantine ang overseas Filipino worker (OFW) gikan sa nasud Taiwan nga nakitaan usab karon sa sintomas sa Covid-19.

Nakasinati og hilanat, sip-on, ubo, sakit sa tutunlan ug luya kaayo ang biktima.

Kasamtangan moabot na sa 60 ka tawo sa Rehiyon 12 ang gipailawom sa monitoring protocol kinsa maoy mga person under monitoring (PUM) gumikan sa Covid-19 sulod sa tulo ka semana ug 45 nila luwas na human makompleto niini ang 14-day quarantine.