KIDAPAWAN CITY -- Misaka ngadto sa 475 ang kinatibuk-ang namatay may kalambigitan sa Covid-19 sa Soccsksargen human laing napulo ka mga pasyente nakalas.

Kini ang ulahi nga natala sa Department of Health (DOH)-Soccsksargen alas 6:00 sa gabii, Lunes, Hunyo 14.

Sa napulo nga namatay, tulo ang taga Surallah, Lake Sebu ug Tupi sa South Cotabato; tulo sab Antipas, M'lang ug Kidapawan City; duha sa General Santos City; samtang tag-usa sa Tacurong City ug Lambayong, Sultan Kudarat.

Hinuon, daghan sab ang nakarekober kung itandi sa mga bag-o nga mga nagpositibo sa Covid-19 nga miabot og 368 ug 280 bag-ong kaso.

Pinakadaghan nga nagpositibo sa Covid-19 sa South Cotabato nga moabot og 143, gisundan sa North Cotabato nga dunay 74, General Santos City 48 samtang ang Sultan Kudarat 15.

Mga nakarekober gilangkuban sa 132 ka mga indibiduwal nga taga South Cotabato, 105 sa Sultan Kudarat, 77 sa General Santos City ug 54 sa North Cotabato.

Samtang miabot sab sa kinatibuk-an nga 16,300 ang nataptan sa sakit samtang kon diin duna say kinatibuk-ang 12,522 nga nakarekober. (Edgar E. Fuerzas)