LABIGAN ang kalipay nga gibati sa usa ka lola nga nagsaulog sa iyang ika-100 kasumaran sa adlaw'ng natawhan human nadawat ang kantidad nga P100,000 isip dugang benepisyo ug prebilihiyo gikan sa pundo sa Department of Social Welfare and Development (DSWD).

Ang maong lola giila nga si Angeles D. Gonzaga, molupyo sa Sitio Guisok, Poblacion, Mawab kinsa nagsaulog sa iyang ika-100 ka tuig nga adlaw’ng natawhan niadtong Lunes, Agosto 8, 2022.

Nasayran nga ang maong lola ang nagsilbing saksi sa kalamboan ug kabag-ohan sa lungsod sa Mawab dungan sa paglabay sa mga katuigan.

Giingon nga kanhi manindahay gawas sa tunghaan sa Mawab Central si Lola Angeles nga sumala pa nakaila na kaniadto ni Mayor Ruperto S. Gonzaga III, samtang nagtungha pa kaniadto sa elementarya ang mayor karon sa lungsod.

Ang maong benepisyo nga nadawat ni Lola Angeles gikan sa pundo sa nahisgutang ahensiya sa gobyerno subay sa Republic Act 10868.