IMPAS ang usa ka drug suspect nga giingong misukol sa mga pulis alas 7:45 sa gabii, Biyernes didto sa probinsiya sa Cotabato.

Giila ang napatay nga si Roger Amante Dilawangan, 36-anyos, minyo ug nagpuyo sa Purok 7, Barangay Kilada, Matalam, Cotabato.

Gibutyag ni Matalam chief of police Lieutenant Colonel Arniel Melocotones nga nagpahigayon sila og drug buy-bust operation sa palengke sa Barangay Poblacion, Matalam, Cotabato.

Ang anak sa suspek nga 15-anyos maoy mitunol sa shabu ngadto sa kapulisan.

Apan nakamatikod si Dilawangan nga mga pulis ang ilang ka-transaksyon hinungdan nga iya kining gipabuthan ug mibalos sab ang mga pulis.

Nakaangkon og upat ka samad pinusilan sa iyang lawas si Dilawangan ug nadala sa balay tambalanan apan gideklara sa mga doktor nga dead on arrival.

Narekober sa mga pulis ang usa ka kalibre .45 nga pistola gikan sa posisyon sa suspek, shabu, mga bala ug magasin.

Sa kasamtangan ang anak ni Dilawangan ang anaa sa poder sa Municipal Social Welfare and Development Office-Matalam ug padayon sab nga giimbestigahan sa kapulisan.