HUSTISYA karon ang gisinggit sa pamilya sa 15-anyos nga lalaki kinsa gipusil-patay sa wa mailhing mamumuno Biyernes sa hapon, Enero 10, didto sa Pag-ibig Drive, Dumoy, Davao City.

Apan sumala ni Police Lieutenant Colonel Ronald Lao, station commander ug Regional Special Operations Group (RSOG) chief sa Police Regional Office (PRO)-Davao Region, nipasalig nga mohimo sila og lawom nga imbestigasyon sa hitabo.

Ingon ni Lao nga ila una nga itago ang pangalan sa menor de edad nga biktima sanglit nagpadayon ang ilang imbestigasyon ug kaproteksyonan ang dungog.

Giingon sab niini nga ang biktima usa ka Children in Conflict with the Law (CICL) kinsa dunay rekord sa kapulisan sa nahimo niini nga salaod.

Nasayran subay sa talaan sa kapulisan nga ang biktima nalambigit sa sunod-sunod nga kawat sa area sa Ecoland ug Dumoy.

Ning bag-o lang, suma ni Lao nga mismong ang amahan sa biktima ang miindorso niini sa Women and Children Protection Desk (WCPD) aron patambagan sa kapulisan, diin human sa pagtambag miuli kini sa ilaha.

“The minor victim was a usual ‘visitor’ in our station because of his involvement in illegal activities. In fact, he was recently released in Bahay Pag-asa last September 2019 after a six-month rehabilitation and diversion program. Unfortunately, he did not change and went back to his transgression,” sulti ni Lao.

Sa scene crime ang kapulisan nakahipos ug usa ka basiyo sa bala sa .45 nga pistola nga posibleng maoy gigamit sa pagpamusil.

Bisan pa man niini, gipasalig sa kapulisan nga mopahigayon sila og lawom nga imbestigasyon sa hitabo aron maila ug masikop ang mga suspetsado. (Jeepy P. Compio)