DUNA nay kinatibuk-ang 33,600 doses sa Sinovac BioTech nga bakuna ang Davao Region nga ibakuna ngadto sa mga medical frontliners sa mga probinsiya ug sa pribadong ospital sa rehiyon.

Kagahapon sa buntag, Marso 4, 2021, ang ikaduhang hugna sa Sinovac nga bakuna nga moabot og 21,600 doses niabot sa Francisco Bangoy International Airport (FBIA).

Niadtong Martes sa buntag, Marso 2, 2021, ang unang hugna sa samang matang sa bakuna nga dunay 12,000 doses niabot sa FBIA. Kini mihatud ngadto sa kinatibuk-an sa Sinovac BioTech nga bakuna sa rehiyon nga 33,600. Niabot kini pinaagi sa Philippine Airlines (PAL) flight mga alas 6:15 sa buntag kagahapon.

Si Department of Health (DOH) Davao Director Annabelle Yumang sa paghinabi sa mga tigbalita, nagsulti nga ilang gidugangan ang ihap sa gilaumang mga medical frontliners nga matupokan sa bakuna. Gikan sa kanhi 8,000 frontliners, naa na karon sa 16,600 frontliners ang bakunahan.

"Buot pasabot niini maapil na gyud ang atuang mga hospitals, atong mga private hospitals. Apil na pud katong naa sa among listahan sa mga probinsiya," tin-aw ni Yumang.

"Gi-increase na siya karon para ma-cover pud nato ang atong mga other private hospitals, LGU hospitals. Tibuok region na siya," dugang niya.

Ang pagbakuna sa mga medical frontliners magsugod karong adlawa, Marso 5, 2021, ilabi na sa Southern Philippines Medical Center (SPMC). Kadto lang mga mas bata sa 60 anyos ang hatagan sa Sinovac. Kadtong mas taas pa sa 60 maghuwat una sa laing matang sa bakuna nga moabot.

Sa 16,600 frontliners, 5,900 magagikan sa SPMC ug 2,000 ubos sa Department of the Interior Local Government.