NAGBANGUTAN ang pamilya ug banay sa duha ka mga bata nga nalumos samtang naligo sa dagsa sa Barangay Pindasan, Mabini, Compostela Valley.

Segun sa taho sa Pantukan Municipal Police Station nga alas 9 sa buntag niadtong Dominggo, Mayo 19, duha ka mga patay'ng lawas sa mga bata ang nakaplagan sa managlahing lugar sa baybay sa Pantukan.

Mga patay'ng lawas giila nga si Arianne Joy Telmo, 8, nagpuyo sa Purok 4, Barangay Quezon, Panabo City, Davao del Norte ug Vince William Villamor, 7, nagpuyo sa Villarosal, Tagum City sa maong probinsiya.

Segun sa imbestigasyon sa kapulisan alas 12:40 sa hapon niadtong Biyernes, Mayo 18, 2018, ang mga biktima nagduwa didto sa kantilado nga bahin sa Jark Beach Resort dihang kalit nga nahanaw. Gipangita ang mga biktima apan alas 9 sa buntag na niadtong Dominggo dihang nabangalan ang patay'ng lawas ni Telmo sa Lower Pangasinan, Kingking, Pantukan, ComVal.

Ang patay'ng lawas ni Villamor nakaplagan sab sa mangingisda nga naglutaw-lutaw sa baybayon sa Barangay Tibagon, Pantukan, ComVal.

Nasayran nga si Villamor nagsaulog sa iyang adlaw'ng natawhan niadtong Biyernes dihang nalumos.

Ang patay'ng lawas sa mga biktima gidala ngadto sa Laroza Funeral Homes sa Barangay Kingking, Pantukan. (Rockyben S. Catisay)