NAGTINGKAGOL sa kamot sa kapulisan ang duha ka kanhi pusher nga nakagawas sa prisohan human mibalik sa ilang daan nga bisyo hinungdan nga gipailawom na sab sila sa buy-bust operation ug nangasikop.

Gipapugngan una sa Davao City Police Office (DCPO) ang pangalan sa duha ka mga pusher nga nasikop Sabado sa kadlawon, Nobyembre 16, 2019 sa McArthur Highway, Barangay Crossing Bayabas, Davao City.

Lakip sa gisikop mao ang usa ka taxi driver nga gisakyan sa duha ka pusher padung sa lugar nga nasabutan sa mga dinakpan ug sa poseur buyer.

Sumala sa DCPO, mokabat sa P1 milyon nga kantidad sa gituohang shabu ang nakumpiska sa mga dinakpan.

Ang mga suspetsado ubos ang ilang pangalan sa Directorate of Intelligence (DI) watch list kinsa gipangbuhian gikan sa Davao City Jail niadtong Disyembre 2018 human sila nakabenepisyo sa plea bargaining nga naaprubahan sa Regional Trial Court 11, Branch 9 sa kalapasan sa Section 5 ug 11 sa Republic Act 9165.

Gipangbalhog sa selda sa Toril Police Station ang tulo ka dinakpan.