MOKABAT sa P40,000 ang kantidad sa gituohang shabu nga nakumpiska sa Task Force (TF)-Davao gikan sa usa ka pasahero dihang miagi sa ilang checkpoint sa Sirawan, Toril District, Davao City niadtong Sabado.

Wala pa giila sa Toril Police Station ang dinakpan diin motimbang sa 2.45 gramos nga shabu ang nakuha sa iyang posisyon.

Giingon sa TF-Davao nga kadudahan ang lihok sa suspek dihang ilahang gihiling ang bag niini.

Samtang sikop sab sa Governor Generoso Municipal Police Station ug 2nd Davao Oriental Provincial Mobile Force Company (DOPMFC) ang usa ka Bryan Jay Oraiz Pontillas, alyas “Dodong Pongkol,” 31-anyos, residente sa Purok 6, Kumintang.

Ang buy-bust operation natigayon didto sa Purok 6, Kumintang, Barangay Tibanban nga miresulta sa pagkasikop sa notadong pusher sa dapit.

Duha ka pakite sa shabu ang nakuha gikan sa iyang posisyon.

Kasong pagsupak sa Republic Act 9165 kun Comprehensive Dangerous Drugs Act of 2002 ang ipasaka sa mga dinakpan didto sa korte. (RFN)