KIDAPAWAN CITY -- Patay ang tulo ka mga tawo, samtang laing usa ang grabe ang kahimtang human magsungag ang duha ka mga motorsiklo alas 7:45 sa gabii, Dominggo, Nobyembre 7, 2021.

Naila ang mga nakabsan sa kinabuhi nga sila John Raymond Gaguing, Bryan Jay Rendon ug John Clark Clavel, samtang ang naangol si Jerivin Vigo Tingoha, mga molupyo sa M'lang, Cotabato Province.

Gibutyag ni M'Lang Chief of Police Lieutenant Colonel Realan Mamon nga sakay ang mga biktima sa duha ka motorsiklo sa National Highway sa Barangay New Rizal sa nahisgutang lungsod apan aksidenteng nagbangga.

Tungod sa kakusog sa impak sa disgrasiya, nangalagpot ang mga biktima sa tunga sa kalsada.

Duha sa mga sakay sa motorsiklo ang on the spot nga napatay, usa ang dead on arrival sa M'lang District Hospital ug usa kritikal ang kahimtang.

Sumala sa nakasaksi sa insidente nga kusog kaayo ang dagan sa motorsiklo nga gimaneho ni Gaguing ug mikalit og bangga sa patabok sa kalsada nga laing motorsiklo nga gimaneho ni Rendon.