MAGUINDANAO -- Nailog sa militar ang lig-ong kampo sa Bangsamoro Islamic Freedom Fighters (BIFF) human ang binakbakay alas 10:30 sa buntag niadtong Martes, Nobyembre 26, sa utlanan sa Shariff Saydona Mustapha ug Pikit, North Cotabato.

Ang binakbakay niresulta sa pagkamatay sa tulo ka mga terorista nga giilang sila si alyas Akmad, Ansari, ug Kedtung nga mga sakop ni Shiekh Esmail Abdulmalik alyas Kumander Abu Toraife.

Gibutyag ni 601st Brigade Commander Colonel Jose Narciso nga gisulod sa puwersa sa 33rd Infantry Battalion ug 12th Special Forces Company sa 5th Special Forces Battalion, Philippine Army ang kampo sa BIFF sa maong lugar.

Apan pasulod pa lang ang militar, gipabuthan na sila sa mga kaaway nga nagtago sa mga punoan sa lubi nga nilungtad og usa ka oras.

Niatras lang ang grupo ni Kumander Abu Toraife sa dihang gibombahan sila sa militar gamit ang 105 mm Howitzers Cannon.

Gawas sa napatay, narekober sab sa militar sulod sa kampo ang upat ka assault rifles, mga bomba, bala, bandila sa Islamic State of Iraq and Syria (Isis) ug personal nga kagamitan sa mga terorista. (Edgar E. Fuerzas)