MOKABAT 33 ka mga pakite sa gituohang shabu ang nasakmit sa kapulisan gikan sa duha ka hamtong ug usa ka menor de edad alas 2:24 kagahapon, Hunyo 23, sa kaadlawon didto sa Kanto Sandawa, New Matina, Davao City.

Subay sa spot report gikan sa Talomo Police Station nga nagpahigayon og Oplan KapKap Bakal-Sita ang sakop sa Police Station 3 dihang usa ka motorsiklo nga walay plaka ang mipaturatoy og padagan bisan naka-red light pa ang traffic light.

Sa maong hitabo, nakuha ang atensiyon sa kapulisan ug gigukod sila. Sa dihang gipangkapkapan ang angkas nga sila Nicole Alsate Legisan, 19; ug alyas Rahim, 16, gilayon nilang gibuhian ang dala nilang mga pakite sa shabu.

Sumala sa driver sa motor nga si Sajir Janjawe Janarin nga wala siya masayod nga shabu ang dala sa iyang mga pasahero hinungdan nga kasohan pod siya og “accessory of the crime.”

Gawas sa mga shabu nga dunay street value nga P79,000 nakuha sab sa ilang posisyon ang kuwarta nga mokantidad sa P1,040 ug selpon.

Sa kasamtangan, balhog ang mga dinakpan sa Talomo Police Station kinsa kasohan og pagsupak sa Republic Act 9165 kun Comprehensive Dangerous Drug Act of 2002 didto sa korte. (JPC)