GIPANGDAKOP sa kapulisan sa Calinan Police Station ang upat ka empleyado sa usa ka pribadong tunghaan sa Calinan Davao City kagahapon, Pebrero 23, gumikan sa gahum sa warrant of arrest nga gipagula sa korte.

Kasong reckless imprudence resulting in homicide ang atubangon nga kaso sa upat ka empleyado nga wala pa gipanganlan sa Calinan police.

Kahinumdoman, Oktubre 2019 samtang nagpahigayon og intramurals ang usa ka tunghaan sa Calinan, aksidente nga nasindihan og kandila ang creative costume sa 12 anyos nga Grade 7 student.

Gumikan gama sa Abaca ang costume, daling mikanit ang kalayo, ug daling gitabunan og basa nga habol ang biktima, apan nakahiagom na kini og mga paso sa lawas.

Nadala pa sa ospital ang biktima, apan namatay sab kini pipila ka oras ang milabay.

Sa hitabo, ang kabanay sa biktima nangayo gayod og hustisya, hinungdan nga mipasaka ang mga ginikanan og reklamo sa mga magtutudlo nga dunay responsibilidad unta sa biktima atol sa programa sa intramurals.

Ang tunghaan wala pa mihatag og pamahayag labot sa pagkasikop sa ilang empleyadong magtutudlo.

Sa kasamtangan, ang upat ka dinakpan temporaryong gikustodiya sa Calinan police sa pagsuwat ning balita kagahapon, Pebrero 23, apan dali ra sab sila nakapiyansa.