UPAT ka mga drayber ug upat ka mga konduktor ang nagpositibo sa gipahigayong random drug testing sa Philippine Drug Enforcement Agency (PDEA-Davao) Lunes, Abril 15.

Kini ang gibutyag ni PDEA-Davao director Ret. Col. Antonio Rivera human sa ilang gipahigayon nga Oplan Huli Week partikular sa Davao City Overland Transport Terminal (DCOTT).

"Migula ang resulta, upat ang nag-positive nga driver, upat sab ang conductor," ingon ni Rivera sa SunStar Davao.

Samtang si PDEA-Davao spokesperson Noli Dimaandal nagbutyag, "Gusto nato maseguro nga safe ang atong mga pasahero karong Semana Santa, busa tanan drayber ug konduktor nga naa karon diri sa terminal, mopailawom gyud sa drug testing."

Sobra usa ka gatus ka mga drayber ug konduktor ang napailawom sa drug test diin sukad sa pagsuwat ning balita wala pa migula ang resulta.

Gipasalig sa PDEA-Davao nga magpadayon ang ilang pag-monitor sa mga terminals ilabi na karong Kuwaresma.

Ang mga nagpositibo ipailawon sa counseling sa PDEA-Davao ug ipatawag ang atensyon sa ilang kompanya. (Richy F. Nalagon)