COTABATO CITY -- Nakaplagan na ang patay nga lawas sa upat ka bata nga nalumos alas 8:30 sa gabii niadtong Lunes sa probinsya sa Maguindanao.

Naila ang mga biktima nga nabugtuan sa kinabuhi nga sila Rhea Balasa, 10 anyos, mga igsuon niini nga sila Rodelyn Balasa, 5, ug Renalyn Balasa, 8.

Patay sab si Jennifer Suizo, 11, ug naluwas ang iyang igsoon nga si Jennelyn Suizo, 8, mga molupyo sa Barangay Simuay, Sultan Kudarat.

Gibutyag ni Barangay Simuay Kapitan Jaber Dalinding nga niadtong miaging adlaw nagsabot ang magsilingan nga maligo sa Simuay River sa Barangay Simuay.

Tungod sa kakusog sa bul-og sa tubig, gi-anod ang mga biktima paingon sa lawom nga parte sa sapa.

Nakalangoy paingon sa daplin sa sapa si Jennelyn nga maoy nangayog pakitabang ngadto sa ilang pamilya ug mga silingan.

Gipangita dayon ang mga bata sa ilang pamilya apan pakyas sila nga kini makaplagan.

Pag-abot sa upat ka oras, nakaplagan ang tulo sa mga biktima nga nasangit sa mga gamot sa kahoy daplin sa Simuay River samtang si Jennifer Suizo nakit-an ang iyang patay nga lawas sa Balabagan Lanao del Sur.

Nagpaabot na og hinabang si Sultan Kudarat Mayor Datu Shameem Mastura ngadto sa pamilya sa mga biktima. (Edgar Fuerzas)