BULUAN, Maguindanao -- Gipangdakop ug gidis-armahan sa militar ang mga armadong sakop sa Moro National Liberation Front (MNLF) alas 10:40 sa buntag, Sabado, Septiyembre 14, sa probinsiya sa Maguindanao.

Sa taho gikan sa 601st Brigade nga nakadawat sila og taho sa mga miyembro sa MNLF nga nagpahigayon og peace rally sa Buluan Municipal Gymnasium sa Buluan Maguindanao.

Ang uban sa mga MNLF armado og mga tag-as nga matang sa armas nga naka-full battle gear.

Nagresponde dayon ang mga sundalo dala sab ang ilang mga semba armored carrier uban ang kapulisan.

Tanan nga mga sakop sa MNLF nga dunay dalang armas gipangdakop sa mga awtoridad.

Muabot sa 50 ka mga tag-as nga matang sa armas ang nailog sa militar ug kapulisan sa 50 ka sakop sa MNLF.

Walay mga dokumento ang mga armas nga dala sa MNLF ilawom sa Misuari Faction ilabina nga Martial Law karon sa Mindanao.

Ang gipangdakop nga sakop sa MNLF nga dunay dala nga armas ang padayon karong gi-imbestigahan sa militar ug kapulisan nga posebling mag-atubang sa tukmang kaso. (Edgar Fuerzas)