DAVAO DE ORO -- Gikustodiya na sa Maragusan Municipal Police Station ang usa ka 60-anyos nga lolo kinsa dunay kasong pagpangsunog og balay.

Ang suspek mao si Paquito Pepito Flores, 60-anyos, minyo, laborer ug molupyo sa Purok Santol, Brgy. Talian, Maragusan.

Nasikop ang suspek subay sa gahum sa warrant of arrest nga gipagula ni Hon. Hilarion Clapis, Jr., Executive Judge sa 11th Judicial Region, Regional Trial Court (RTC) Branch 3, Nabunturan, Davao De Oro Province.

Ang kaso sa suspek nanukad sa kasong arson niadtong Enero 23, 2008 kinsa maoy gikonsiderang Top 3 most wanted sa Maragusan MPS.

Nabingwit ang suspetsado sa gilusad nga manhunt Charlie operation didto sa Purok Dagohoy, Brgy. New Albay, Maragusan sa alas 6:30 sa gabii, Sabado.

Mokabat sa P24 mil ang girekomendang piyansa sa korte bugti sa temporaryong kagawasan sa suspek.