Pito ka mga batan-on ang gipang-rescue sa mga personahe sa Mati Public Safety Office gabii sa Miyerkules, Agosto 4, 2021, human sila makit-ang gatambay sa may Belsonda area, Mati City, Davao Oriental bisan pa man oras na sa curfew.

Subay sa report sa Public Safety Office, alas 10:50 sa gabii sa dihang namonitor nila ang mga kabatan-onan samtang gatambay daplin sa usa ka balay. Daling nakigkoordinar ang Public Safety sa Barangay Central Barangay Peacekeeping Action Teams tungod sa posibleng panag-riot nga mahitabo sa lugar.

Mga na-rescue pulos menor de edad nga nagpangedaron og 13 hangtud 16 anyos, diin usa niini babaye.

Nakuhaan ang mga batan-on og usa ka sumpak, usa sa kutsilyo, ug usa ka screwdriver.

Mga na-rescue daling gi-turnover ngadto sa kapulisan alang sa tukmang disposasyon ug nakatakdang ipatawag ang ilang mga ginikanan. (Jeepy P. Compio/CIO Mati City)