SIYAM ka mga former communist New People's Army (NPA) ang mitahan dala ang ilang mga armas ngadto sa militar.

Adlaw'ng Martes miatubang sila kang Davao City Mayor Sara Duterte-Carpio. Sila mitahan gumikan wala na sila kaantus sa ilang kinabuhi sa bukid, gigutom ug puno sa pasalig sa ilang kadagkoan.

Mitahan sila pinaagi sa paningkamot sa lokal nga kagamhanan sa Davao City, kauban ang 10th Infantry Division, Philippine Army ug Indigenous Peoples (IP) leaders.

Nagpasalamat si Duterte-Carpio sa 10th ID ug sa tanang army forces sama sa 1003rd Army Brigade sa paningkamot sa suporta niini sa gobyerno sa pagdayong panawagan sa pagtapos sa local communist armed conflict.

"Ipaabot niyo please ang aming pasalamat sa lahat ng tropa ng respective units ninyo," tipik sa pamulong ni Duterte-Carpio atubangan sa City Hall atol sa seremonya.

Ang mga mitahan makahimulos sa Enhanced Comprehensive Local Integration Program sa gobyerno diin hatagan sila og complete package sa assistance.