DIGOS CITY -- Siyam ka trabahante sa Small Town Lottery (STL) sa Cebu nga niuli dinhi sa dakbayan nag-positibo sa Sars-CoV-2, ang kagaw nga hinungdan sa coronavirus disease (Covid-19), human miguwa ang resulta niadtong Miyerkules, Agosto 5, 2020, sa miaging semana.

Sa bulletin sa Covid-19 updates, gibutyag sa lokal nga gobyerno nga ang siyam ka trabahante na-stranded didto sa Cebu sud sa lima ka bulan dihang naundang ang duwa sa Philippine Charity Sweepstakes Office.

Pulos nagpuyo sa usa ka apartment sa Barangay Ponce ang siyam apan midunggo sa Cagayan de Oro niadtong Lunes, Agosto 3, diin sila gisundo sa mga opisyal sa panglawas.

Hinuon, wa nagpakita og sintomas ang mga pasyente nga gibutang na sa city isolation unit.

Niadtong Dominggo, Agosto 9, gibutyag sa City Health Office (CHO) nga mokabat na sa 35 ang nag-positibo sa sakit sa dakbayan, diin sa maong ihap 23 na ang nakarekober ug 12 ang admitted.

Dugang sa CHO nga 32 ang suspek pa lang ug 31 ang anaa sa isolation unit diin mokabat sa 128 ang gipailawom sa home quarantine.