KIDAPAWAN CITY -- Milupad ang helikopter sa Philippine Air Force (PAF) Tactical Operation Group (TOG-11) paingon sa mga hilit nga dapit sa Makilala North Cotabato nga nanghulog og pagkaon lakip na sanina.

Gihatdan sa lokal nga panggamhanan sa probinsiya sa Cotabato ang Sitio Kapatagan, Barangay Luayon sa Makilala.

Wala pa maabot sa mga sakop sa search and rescue group ang Sitio Kapatagan sugod niadtong Oktubre 29 gumikan sa mga dagkong pagdahili sa yuta sa unang pag-igo sa magnitude 6.3 nga linog.

Gamit ang helikopter sa TOG-11, nanghulog ang mga emergency response personnel og unom ka sako nga relief goods.

Sulod sa sako ang bugas, mga delata, tubig og mga sanina nga magamit dayon sa mga naapektuhan sa linog.

Muabot sa sobra 20 ka pamilya sa Sitio Kapatagan ang anaa sa ilang dapit og wala makagawas paingon sa mga evacuation center gumikan sa pagdahili sa yuta.

Naningkamot karon ang search and rescue units sa North Cotabato nga mahikling ang mga molupyo sa Sitio Kapatagan og maluwas.

Usa sa mga nakita nga solusyon nga maluwas ang mga naipit sa landslide nga hakuton sila gamit ang helicopter.

Kadaghanan sa mga molupyo sa Barangay Luayon ang anaa karon sa Malasila Elementary School nga gi-puwersa sa paghikling.

Sa kasamtangan, nagpadayon ang pang-apud-apod og hinabang sa Provincial Government sa Cotabato sa pagpanguna ni Acting Governor Emmylou ”Lala” Taliño-Mendoza sa libuan ka pamilya nga naapektuhan sa sunod-sunod nga pagtay-og sa yuta. (EEF)