KIDAPAWAN CITY -- Nakurat ang mga molupyo sa Alamada, North Cotabato sa pag-ulan og "ice" sa ilang dapit alas 4 sa hapon niadtong adlaw nga Dominggo.

Sa Facebook post ni Benedict Tenizo, nakuhaan niini og video sa iyang cellphone ang pag-ulan og ice sa Barangay Pigcawaran sa lungsod sa Alamada.

Dako pa sa mga lugas sa mais ang ice nga mitagaktak sa kabalayan sa Barangay Pigcawaran.

Sakit sa lawas ang igo sa pag-ulan sa ice, hinungdan nga wala na migawas ang taga Alamada.

Pila lang ka minuto ang paglungtad sa pag-ulan og ice sa Barangay Pigcawaran dungan sa makusog nga ulan ug hangin.

Gipasabot sa Pagasa-Cotabato nga normal alang sa lugar ang makasinati nga mag-ulan og ice gumikan ang lungsod sa Alamada usa ka bukirong ug bugnaw nga dapit.

Dugang pa duol sa mga panganod ang dapit gumikan sa mga taas nga buntod ug ang gilay-on gikan sa yuta hangtod sa kawanangan diin nagporma ang gitawag nga cumulonimbus.

Ang cumulonimbus usa ka panganod nga maoy nagdala og bugnaw nga ulan nga dunay sagol nga migahi nga tubig nga napormang ice.