GITIN-AW ni Barangay 21-C Captain Edmundo Altizo nga wa siya nag-imposar og lockdown sa barangay, sukwahi sa post sa social media nga nagkatap niadtong Miyerkules, Hulyo 8, 2020.

"Dili kana tinuod, siguro na misinterpret lang sa uban ilang nadunggan gikan sa miting namo," pagtin-aw sa kapitan sa dihang nahinabi sa SunStar Davao.

Naglibog si Altizo kung giunsa nila og gama ang maong istorya, kay "wala gyud ko kabalo asa ni gikan."

Dugang pa niya nga ang barangay bukas sa mga molupyo nga nagbalhin gikan sa ubang mga barangay apan nagplano siya karon nga pakuhaon sila og medical certificates aron nga maseguro nga wala sila magdala sa kagaw sa Covid-19.

Ang post sa social media mabasa nga "Nagpatuman na og Lockdown ang Barangay 21-C, sa Davao City diin sumala ni Barangay Captain Edmundo Altizo Sr., wala na sila nagpasulod og residente gikan sa Barangay 23-c nga ila rang silingan. Gipaniguro usab ni Altizo nga adunay igong supply sa pagkaon alang sa iyang ginasakupan. Kahinomduman nga ning milabay'ng semana, una ng nagpatuman og hard lockdown ang Barangay 23-c tungod sa nagpadayong pagtaas sa kaso sa covid-19."

Apan ang maong post gi-share na sa kapin 450 ka tawo sukad Hulyo 8, alas 5 sa hapon. (Cristina E. Alivio)