PATAY ang usa ka 69-anyos nga amahan samtang nagpaayo sa ospital ang anak niini nga babaye human sila pangdunggaba sa usa ka 56-anyos nga lalaki alas 6:30 sa buntag niadtong Biyernes didto sa Kabacan, Barangay 76-A, Bucana, Davao City.

Ang kapulisan sa Talomo Police Station nag-ila sa suspek nga si Erwin Apolentesima Capul, 56-anyos, residente sa Taal Bangkal, Talomo District samtang ang mga biktima mao sila Trinidad Tulo Barriga, ug ang anak niini nga babaye nga si Mildred Villarba Barriga, 49-anyos, pulos nagpuyo sa San Isidro Kalubihan, Kabacan.

Sa inisyal nga imbestigasyon sa kapulisan sa Talomo PNP, gusto unta mosulod sa suspek sa balay sa mga biktima.

Sumala ni Davao City Police Office (DCPO) spokesperson Police Captain Rosario Aguilar nga dunay relasyon si Mildred ug ang suspek.

“As alleged, kining suspek ug kining victim nga si Mildred dunay relasyon,” sulti ni Captain Aguilar sa pakighinabi sa SuperBalita Biyernes pinaagi sa telepono.

Giingon nga una ang hitabo, dunay panaglalis ang suspek ug ang biktima nga si Mildred gumikan sa ilang kanhi relasyon.

Atol sa hitabo, hilabihan ang kalagot sa suspek hinungdan nga mikuha kini og kutsilyo sa iyang bag, dayon milugso sa kural ug gidunggab si Mildred.

Nakadagan pa si Mildred ug ang amahan niini sa taas sa ilang balay ug nanirado aron di kasaka ang suspek, apan pugsanon nga giguba sa suspek ang pultahan hinungdan nga iyang nagunitan ang 69-anyos nga edaran ug giayo’g dunggab nga maoy hinungdan sa hinanaling kamatayon.

Gidunggab sab niini pag-ayo si Mildred apan wala maintimano ug nadala pa sa ospital.

Human sa hitabo, ang suspek daling misibat padung sa wa matino nga direksiyon apan sa gihimong follow-up operation sa kapulisan, nasikop ang suspek.

Adlaw’ng Biyernes, ang suspek gibalhog sa selda sa Talomo Police Station samtang giandam na ang kaso nga ipasaka kaniya didto sa korte. (Jeepy P. Compio)