BANSALAN, Davao del Sur -- Patay na nga nahidangat sa ospital ang usa 65-anyos human gipusil sa iyang anak-anak nga sakop sa Cafgu Active Auxiliary (CAA) Sabado sa gabii, Septiyembre 25, didto sa Sitio Bagong Silang, Managa.

Ang Bansalan Municipal Police Station nag-ila sa biktima nga si Paquito Tagon, 65-anyos, mag-uuma, samtang ang suspek mao si Artemio Dalucan Egoc, 30-anyos, minyo, CAA member, ug nadestino sa 73rd Infantry Battalion sa Malita, Davao Occidental ug residente sa Barangay Kinangan, Malita.

Nasayran nga mibisita ang suspek sa balay sa iyang inahan apan naabtan kini sa iyang ama-ama kinsa lango sa ilimnong makahubog.

Sa kalagot sa tiguwang sa ilang daan nga bikil, mikuha kini og sundang dayon tigbas sa suspek, apan nakalikay ang Cafgu hinungdan nga mibunlot kini og pusil dayon gipusil ang biktima.

Nadala pa sa balay tambalanan ang biktima apan nakabsan na kini sa kinabuhi samtang ang suspek dali sab nga mitahan sa awtoridad. (Jeepy P. Compio)