WA PAY matumbok nga motibo ang kapulisan sa hinungdan sa pagpatay sa usa ka bodyguard sa kaugalingon niyang amo (agalon) sa Purok 1, Barangay Suawun, New Corella, Davao del Norte alas 5:30 sa buntag, Huwebes, Pebrero 2, 2023.

Ang biktima giila nga si Ansary Camarelleo Acmad, 35, minyo, ug molupyo sa Purok 3B, Apokon, Tagum City. Ang suspek nailhan nga si Junifer Malinao Malayao, 45, minyo, taga Purok 5, Poblacion, New Corella.

Base sa inisyal nga imbestigasyon, si Acmad nagmaneho sa gisakyang Mitsubishi pickup nga dunay plaka nga Y1 R597, sakay ang asawa nga si Maria Victoriano Del Campo Acmad nga naglingkod sa passenger seat. Ang suspek nga bodyguard naglingkod sa likod nga lingkuranan.

Apan kalit lang gipusil sa suspek ang biktima nga maayong pagkaigo sa ulo.

Human sa pagpamusil, nagdaling mikagiw ang suspek paingon sa wala masayring direksiyon.

Narekober gikan sa crime scene ang upat ka basiyo sa bala sa kalibre 9-millimeter pistol.

Milusad na og manhunt operation ang kapulisan sa New Corella Municipal Police Station aron nga madakpan ang bodyguard nga misibat aron nga manubag sa krimen.