USA sa mga prayoridad karon sa kagamhanang probinsiyal sa North Cotabato mao ang pagpalit og mga anti-venom aron nga gamiton sa Cotabato Provincial Hospital.

Gitahasan ni Governor Nancy Catamco si Integrated Provincial Health Office-Cotabato Chief Dr. Eva Rabaya nga mopalit dayon sa mga nahisgutan.

Kini human nga gibalaka ni Catamco ang pagtaas sa ihap sa mga nangamatay tungod kay napahitan og lala nga banakon o King Cobra.

Pinakaulahing napaakan-patay sa banakon ang 16-anyos nga dalagita sa Barangay Noa, Magpet.

Naggahin ang probinsiya og P200,000 nga pampalit og 80 Polyvalent anti-venom vials nga magamit dayon sa mga mapaakan sa banakon ug uban pang matang sa bitin.

Nasayran nga nidaghan ang napaakan og banakon human mitay-og ang sunod-sunod nga linog sa probinsiya niadtong nakalabay nga tuig nga posibleng nakabulabog sa mga halas ug nanggawas sa ilang mga gitagoang lugar.

Apil sab sa paliton ang 100 anti-rabies vials nga gigahinan og P238,000 alang sa mga mapaakan og iro.