MARAGUSAN, Davao de Oro -- Daghang mga armas ug mga buhing bala ang narekober sa awtoridad atol sa pagsilbi sa search warrant, Abril 21, 2022, didto sa Purok Pinetree 2, Barangay Poblacion sa nasampit nga probinsiya.

Giila sa Maragusan Municipal Police Station ang suspek nga si alyas Bernard (bansagon gitago), 30-anyos, ug molupyo sa nasampit nga dapit.

Usa ka hiniusang puwersa sa operasyon ang gihimo sa Maragusan police, kauban ang mga tropa sa 113 Special Action Company, 11 Special Action Battalion, PNP-SAF ug Provincial Intelligence Unit sa pagpanguna ni Police Lieutenant Colonel Clifford John Nabor.

Sumala sa report, nakadawat og impormasyon ang awtoridad sa giingong dunay daghang pusil ang suspek, hinungdan nga mipagawas og search warrant ang korte.

Atol sa pagronda, nakumpiska sa kapulisan ang usa ka armalite, 47 ka basiyo sa mga bala sa mga nagkalain-laing pusil, usa ka kalibre .45 pistol, pito ka magazine sa mga nagkalain-laing pusil, usa ka Uzi, tulo ka 12 gauge shotgun nga bala, 12 ka mga bala sa .357 point pistol, lima ka mga bala sa 7.62, usa ka itom nga sling bag ug usa ka pula nga weapons container bag.

Gikanayon ni Police Captain Dexter James Melicor, ang chief of police sa Maragusan, nga ang pagkasikop sa suspek resulta sa kampanya sa PNP batok anti-criminality ug kampanya batok sa loose firearms dungan sa pagpatuman sa nationwide gun ban isip pagpangandam sa umaabot nga 2022 elections aron masegurong hapsay ug malinawon ang piniliay sa Mayo 9, 2022.