DAW nahugno ang kalibutan sa usa ka mister dihang iyang nakita ang iyang misis nga dunay kahungit alas 8:30 sa gabii niadtong Martes, Pebrero 25, sa usa ka restawran sa University Avenue, Juna Subdivision, Davao City.

Perteng laguta sa mister nga si Rodrigo (bansagon gitago), 43-anyos, kawani sa gobyerno ug residente sa S.I.R, New Matina dihang iyang nakita ang iyang misis nga dunay kauban nga lalaki.

Ang maong lalaki gituohan ni Rodrigo nga kabit sa iyang misis, hinungdan nga iya kining gisundan gamit ang iyang motorsiklo.

Pag-abot niini sa ikaduhang eskina sa University Avenue, misulod ang misis ug ang kaubang lalaki sa restawran.

Naniid lamang ang bana gikan sa layo gumikan makita niya kini kay naka-glass ang bungbong sa maong restawran.

Misamot ang pagbukal sa dugo sa bana dihang iyang nakita nga naghinungitay na ang duha.

Gilayong midangop sa kapulisan ang bana ug mihangyo kini og mobile patrol, apan pag-abot nila sa dapit nahuman na og pangaon ang duha ug nanggawas na.

Igo na lang sa pagpa-blotter ang bana ug iyang gitago ang hulagway nga kuha sa iyang cellphone aron mao unya ang iyang gamiton nga ebidensiya sa pagpasaka og reklamo batok sa maluibon niyang asawa ug sa gituohang kabit niini.