COTABATO CITY -- Nabulit ang lawas sa babaye og mga samad dinunggaban kinsa nakaplagan nga wala nay kinabuhi alas 4:45 sa hapon niadtong Lunes sa Datu Odin Sinsuat, Maguindanao.

Ang biktima wala pa mailhi hangtud ning pagsuwat ug anaa sa Villa Funeral Homes sa Cotabato City.

Matud ni Datu Odin Sinsuat Chief of Police Major Rommel Dela Vega nga mismong mga molupyo sa Sitio Lasdan, Barangay Linek sa maong lungsod maoy nakakita sa patay nga lawas sa biktima ug maoy mitaho dayon sa ilang buhatan.

Ang biktima gihulagway nga kulot ang buhok, gibana-bana nga 5'2" ang gitas-on, nagpangedaron og 30 hangtud 45 anyos, kasarangan ang panglawas, nakasul-ob og itom nga long sweater, pink t-shirt, pula ang bra, kolor asul nga leggings pants ug naka- black sandal.

Nakaangkon siya og daghang samad dinunggaban sa nagkadaiyang parte sa lawas nga maoy hinungdan sa iyang kamatayon.

Nagtuo ang mga awtoridad nga gipatay nang daan sa laing lugar ang biktima ug gilabay ang iyang lawas sa maong lugar.

Padayon pang nangalakap og dugang impormasyon ang kapulisan aron nga mailhan ang biktima ug madakpan ang mga suspek sa maong krimen.