USA ka lawom nga imbestigasyon ang gihimo sa Baguio Police Station sa Davao City Police Office sa pagpatay sa usa ka babaye kinsa giingong nalambigit sa kasong pagluib sa hinigugma ug away sa yuta.

Ang pagpamusil nahitabo alas 5:10 sa gabii, Marso 26, 2022, didto sa Purok 4B, Barangay Malagos, Baguio District, Davao City.

Giila sa Baguio police ang biktima nga si Vanessa Peñafort Onde, 38, nagpuyo sa nasampit nga dapit.

Sumala sa inisyal nga imbestigasyon sa Baguio police, nasayran nga nagpalit lamang og sigarilyo ang biktima dihang usa ka mamumuno sakay sa motorsiklo ang kalit lang namusil.

Gilayong nahagba ang biktima kinsa dunay mga samad sa kalawasan partikular sa ulo niini gamit sa .45 nga pistola.

Ang station commander sa Baguio police nga si Police Major Ricky Obenza nanguna sa pagpahigayon sa makuting imbestigasyon sa krimen.

Una niini, nagbutyag ang pamilya nga nakadawat na og bahad sa kinabuhi ang biktima kinsa dunay pending case sa Municipal Trial Court sa kasong Concubinage ug nalambigit kini sa giingong pamilya sa lalaki nga giingong dunay tago nga pagbati sa biktima.

Ang Davao City Forensic Unit padayon sab nga naghimo og eksaminasyon sa mga ebidensiya diin ang patay nga lawas sa biktima anaa gihaya sa Freedom Life Chapels.