NAGPUNGASI sa Buhangin Police Station ang usa ka 31-anyos nga babaye kay iyang gipadakop ang iyang manyak nga silingan.

Subay sa blotter sa Buhangin PNP mireklamo ang usa ka Marilyn, taga Purok 15, Barangay Tigatto, Buhangin District, Davao City, kay gibaklad siya.

Saysay ni Marilyn nga samtang hubo siya nga naligo sud sa ilang banyo, namalbas sab kini sa buhok sa iyang pribadong parti sa lawas.

Dako iyang kakurat dihang iyang nakita nga duna pa diay buslot ang ilang banyo ug didto miayo’g budlat ang mata sa iyang silingan nga si Raul, 23-anyos.

Giingon ni Marilyn nga dili na kini ang unang higayon nga gibaklad siya sa suspek nga gibaniog nga manyak sa ilang dapit.

Dihang nakita sa babaye ang mata sa suspek didto sa buslot, iya kining gidukdok og kabo hinungdan nga perting dagan sa suspek.

Daling nag-ilis ang biktima ug nagdala og mobile patrol aron ipadakop ang suspek.

Hinuon giangkon sa suspek ang maong salaud ug andam siya modawat sa ipasaka nga reklamo batok kaniya didto sa korte.

Sa kasamtangan, balhog karon ang suspek sa Buhangin PNP.