DAVAO DEL SUR -- Gikustodiya na sa Digos City Police Office (DCPO) ang usa ka babayeng ekstorsyonista aron pasakaan og kaso.

Ang suspek nga nagpailang kumander sa New People's Army (NPA) nasikop pinaagi sa entrapment operation alas 10:30 sa buntag niadtong Sabado, Marso 2.

Sumala ni Police Senior Superintendent Alan Manibog, police provincial director, ang suspek nailhan nga si Jocelyn Clemeña Bagaipo, 43, minyo nga molupyo sa Tuto Extension, Gingoog City, Misamis Oriental.

Gihimo sa mga otoridad ang joint police operation kuyog ang Carmen police station sa Davao del Norte ug naaktuhan ang suspek nga mikobra sa Palawan Pera Padala Carmen, Davao del Norte branch.

Usa ka negosyante nga gitago sa ngalang Anrym ug taga Digos City, ang nagpatabang sa kapulisan human nakadawat og text message gikan sa suspek kinsa nagpaila nga kumander sa NPA ug nangayo og salaping mobalor sa P3,000 agi og pera padala.

Atol sa entrapment operation, nakuha sa posisyon niini ang salaping mobalor sa P13, 700, 13 kabuok nga resibo sa Palawan Express Padala receipt ug Oppo cellular phone.

Napadlak na sa selda sa DCPO ang suspek.

"The incident revealed that despite of the extensive effort undertaken by the authorities, there are still extortionist roaming around in our locality, but the PNP will not hesitate to apprehend these criminals," asoy ni Manibog.

Gipahimagnoan sab niini ang publiko nga motaho dayon sa kapulisan kun makadawat og mga text extortion sama sa nahitabo sa negusyante.