MATANAO, Davao del Sur -- Walo ka mga hubog ang unang nakagamit sa bag-ong nahuman nga selda sa Matanao Municipal Police Station human gisupak nila ang gipatumang enhanced community quarantine (ECQ) niadtong Martes.

Gumikan niini, sa wa pagtuman sa 24-liquor ban, nagtingkagol sa bag-ong selda ang mga suspek nga sila si Reynaldo Largo Alberio, 36; Gilbert Caya Gonzales, 27; Jobert Pandoy Malagante, 25; Allan Camay Villamero, 43; Jay-Ar Yunson Salangron, 19; Glen Gequilan Tangu-an, 26; Hammer Lasib Dasan, 26; ug Ryan Diambolang Tamba.

Hinuon sumala ni Captain Rhuel Barachina nga nakagawas na ang walo niadtong Miyerkules human nakabayad og multa nga P500 matag usa apan ila na kining gitunol ngadto sa barangay alang sa lima ka adlaw nga community service.

Subay sa Municipal Ordinance 240 nga gi-aprobahan sa Sangguniang Bayan sa lungsod, magmulta og P500 ang usa ka indibiduwal sa unang higayon nga kini madakpan sa paglapas sa Executive Order 2020-04, 2020-06 ug 2020-08 series of 2020 nga gilagdaan sa mayor ug mohimo og lima ka adlaw nga community service.

Wa pa hinooy, nadakpan sa ikaduhang higayon diin ang gitakdang multa mobalor na sa P1,000 ug 10-adlaw nga community service samtang sa ikatulong higayon kantidad P2,500 ug 15-adlaw nga community service.

Hugot nga nagpasidaan ang kapulisan ngadto sa mga tindahan nga mamaligya sa ilimnong makahubog nga mahimo silang dakpon ug embarguhon ang ilang business permit aron di na makapamaligya. (Orlando B. Dinoy)